ພະຍາດ ແລະ ແມງໄມ້ສັດຕູພືດທີ່ມັກເກີດກັບໝາກເດືອຍ ~ New steps

ພະຍາດທີ່ພົບຄັ້ງທຳອິດໃນປະເທດໄທເມື່ອປີ 1981 ທີ່ເກີດຈາກເຊື້ອຣາ Ustilago coicis Bref. ໃນຂະນະນັ້ນຈາກການສຳຫຼວດໄຮ່ໝາກເດືອຍພົບວ່າເປັນພະຍາດນີ້ 5-98%. ຈົນມາເຖິງປີ 1992 ກໍ່ຍັງພົບວ່າພະຍາດນີ້ຍັງລະບາດຢູ່, ໃນບາງປີພະຍາດນີ້ມີການລະບາດຢ່າງຮຸນແຮງ ອັນໄດ້ກໍ່ຄວາມເສຍຫາຍຈົນບໍ່ສາມາດເກັບກ່ຽວຜົນຜະລິດໝາກເດືອຍໄດ້.

ການປ້ອງກັນກຳຈັດ: ແຊ່ເມັດພັນໃນນ້ຳຮ້ອນທີ່ອຸນຫະພູມ 60-70°Cໂດຍວິທີການຕົ້ມນ້ຳໃຫ້ຟົດແລ້ວຕັ້ງໄວ້ທີ່ອຸນຫະພູມຫ້ອງປະມານ 10 ນາທີເພື່ອໃຫ້ນ້ຳເຢັນລົງເທົ່າອຸນຫະພູມທີ່ຕ້ອງການ ແລ້ວຈື່ງນຳເມັດໝາກເດືອຍມາແຊ່ດົນເຖິງ 12 ຊົ່ວໂມງກ່ອນນຳໄປປູກ. ວິທີນີ້ນອກຈາກຈະເປັນການຂ້າເຊື້ອພະຍາດທີ່ຕິດມາກັບເມັດແລ້ວ ມັນຍັງຈະຊ່ວຍເຮັດໃຫ້ເມັດໝາກເດືອຍງອກໄວຂຶ້ນອີກດ້ວຍ.

ສານເຄມີທີ່ໃຊ້ກຳຈັດພະຍາດຣາດຳມີຄື:

· ຊື່ສາມັນ: Fenpiclonil carboxyl ແລະ ຊື່ການຄ້າ Beret. ອັດຕາການໃຊ້ 5 cc ຕໍ່ນ້ຳໜັກເມັດ 1 kg ດ້ວຍວິທີການຄຸມເມັດກ່ອນປູກ.

· ຊື່ສາມັນ: Fenpiclonil carboxyl ແລະ ຊື່ການຄ້າ Culator. ອັດຕາການໃຊ້ 7g ຕໍ່ນ້ຳໜັກເມັດ 1 kg ດ້ວຍວິທີການຄຸມເມັດກ່ອນປູກ

ຂ. ພະຍາດໃບດ່າງ

ການສະແດງທີ່ກາບໃບ ແລະ ໃບ, ເກີດເປັນຈຸດນ້ອຍໆຂະໜາດເທົ່າເຂັມໝຸດສີເຫຼືອງອ່ອນ, ຕໍ່ມາກາງຈຸດຈະແຫ້ງມີສີຂີ້ເທົ່າ ຫຼື ສີນ້ຳຕານອ່ອນ ແລະ ໃນທີ່ສຸດຈະປ່ຽນເປັນສີນ້ຳຕານໄໝ້, ຈຸດໃຫຍ່ມີຂະໜາດເຖິງ 4 mm. ເຊື້ອສາເຫດຄື Curvularia coicis.

ການປ້ອງກັນກຳຈັດ:

· ຫຼີກລຽງການນຳເມັດພັນຈາກແຫຼ່ງທີ່ເປັນພະຍາດມາເຮັດແນວພັນ.

· ເຜົ່າທຳລາຍເສດເຫຼືອຂອງໝາກເດືອຍໃນໄຮ່ຫຼັງເກັບກ່ຽວ

1.1.2 ແມງໄມ້ສັດຕູ

ກ. ຕັກແຕນ

ການທຳລາຍຄືການກັດກິນໃບ, ກິ່ງກ້ານ, ລຳຕົ້ນອ່ອນ ແລະ ຊໍ່ດອກ. ການປ້ອງກັນກຳຈັດຄືການໄຖພວນດິນ ແລະ ຕາກດິນເພື່ອທຳລາຍໄຂ່ຕັກແຕນກ່ອນປູກໝາກເດືອຍ.

ຂ. ປວກ

ຈະເຂົ້າທຳລາຍໃນໄລຍະທີ່ໝາກເດືອຍເລີ່ມອອກດອກໂດຍຈະກັດກິນບໍລິເວນຕົ້ນ ແລະ ພາຍໃນລຳຕົ້ນ, ເຊິ່ງເບິ່ງຢູ່ພາຍນອກຈະບໍ່ເຫັນການທຳລາຍຂອງປວກອັນເຮັດໃຫ້ຊໍ່ດອກແຫ້ງບໍ່ຕິດເມັດ ແລະ ຕົ້ນແຫ້ງຕາຍ.

ການປ້ອງກັນກຳຈັດ: ຖ້າພົບມີການລະບາດຫຼາຍໃຫ້ສີດພົ່ນສານຂ້າແມງໄມ້ Fipronil ໃນອັດຕາ 80 ml/ນ້ຳ 20 ລີດຫຼັງຈາກຢອດເມັດໝາກເດືອຍ.

ຄ. ໜອນກໍລາຍ

ເຂົ້າທຳລາຍໝາກເດືອຍຕັ້ງແຕ່ໝາກເດືອຍອາຍຸ 11 ວັນ ເຖິງ 2 ເດືອນ ໂດຍຈະເຂົ້າໄປກັດກິນຢູ່ພາຍໃນລຳຕົ້ນ ຫຼື ແໜງ, ເຮັດໃຫ້ລຳຕົ້ນ ຫຼື ແໜງ ທີ່ຖືກທຳລາຍຫັກລົ້ມຫ່ຽວບໍ່ເປັນໝາກ ແລະ ເຮັດໃຫ້ເມັດລີບ. ການເຂົ້າທຳລາຍຈະເພີ່ມຂຶ້ນເມື່ອໝາກເດືອຍອາຍຸໄດ້ 2 ເດືອນ ເຖິງ 2 ເດືອນເຄີ່ງ ເຊິ່ງເປັນໄລຍະທີ່ໝາກເດືອຍແຕກແໜງ.

ການປ້ອງກັນກຳຈັດ: ໃຫ້ສີດພົ່ນສານຂ້າແມງໄມ້ເມື່ອພົບການທຳລາຍຂອງໜອນກໍລາຍ, ສານຂ້າແມງໄມ້ຄື deltanethrin ໃນອັດຕາ 10 ml/ນ້ຳ 20 ລີດ

ງ. ເພ້ຍອ່ອນສາລີ

ເຂົ້າທຳລາຍຕັ້ງແຕ່ໄລຍະຕົ້ນອ່ອນ ຈົນເຖິງໄລຍະທີ່ໝາກເດືອຍເລີ່ມອອກຊໍ່ດອກໂດຍດູດກິນນ້ຳລ້ຽງຕາມຍອດ, ພົບເພ້ຍອ່ອນສາລີຫຼາຍທີ່ສຸດເມື່ອ ໝາກເດືອຍອາຍຸ 2 ເດືອນ.

ການປ້ອງກັນກຳຈັດ: ຖ້າພົບການລະບາດຂອງເພ້ຍອ່ອນສາລີ ໃຫ້ສີດພົ່ນສານຂ້າແມງໄມ້ Malathion ໃນອັດຕາ 40 ml/ນ້ຳ 20 ລີດ.

ຈ. ໜອນເຈາະໝາກຝ້າຍ

ເຫັນເຂົ້າທຳລາຍໝາກເດືອຍຫຼັງຈາກໝາກເດືອຍເລີ່ມຕິດເມັດແລ້ວ ໂດຍຕົວໜອນຈະເຈາະ ແລະ ກັດກິນເມັດໝາກເດືອຍຈົນໝົດ.

ການປ້ອງກັນກຳຈັດ: ຖ້າພົບການລະບາດຂອງໜອນເຈາະໝາກຝ້າຍ ໃຫ້ສີດພົ່ນສານຂ້າແມງໄມ້ bifenthrin ໃນອັດຕາ 30 ml/ນ້ຳ 20 ລີດ.

ສ. ໜອນເຈາະລຳຕົ້ນສາລີ

ລັກສະນະ ແລະ ການທຳລາຍເປັນເວລາກາງ ຄືນ, ສີທອງອົມແດງ, ຢູ່ກາງປີກມີຄວາມກວ້າງປະມານ 2.5 cm, ລຳຕົວຍາວປະມານ 1.3 cm. ໜອນເຈາະລຳຕົ້ນສາລີຈະວາງໄຂ່ເປັນກຸ່ມຊ້ອນຮຽງກັນຄ້າຍຄືເກັດປາ, ຜິວລຽບ ແລະ ເປັນມັນ. ຕົວໜອນ ເມື່ອຝັກອອກມາຈາກໄຂ່ໃໝ່ໆຈະມີສີຂາວຕະຫຼອດທາງລຳຕົວ, ຫົວກະໂຫຼກສີນ້ຳຕານດຳ. ຕົວໜອນຈະເຈາະເຂົ້າໄປກັດກິນຢູ່ໃນລຳຕົ້ນ ແລະ ກິ່ງແໜງຂອງໝາກເດືອຍ, ເຮັດໃຫ້ລຳຕົ້ນ ແລະ ກິ່ງແໜງຫັກ ແລະ ແຫ້ງຕາຍ, ນອກຈາກນີ້ໜອນເຈາະລຳຕົ້ນສາລີຍັງເຂົ້າໄປກັດກິນເມັດໝາກເດືອຍ, ເຮັດໃຫ້ເມັດລີບ ຫຼື ອາດບໍ່ຕິດເມັດ. ຊ່ວງການລະບາດ, ໜອນເຈາະລຳຕົ້ນສາລີຈະເຂົ້າທຳລາຍໝາກເດືອຍເມື່ອໝາກເດືອຍອາຍຸປະມານ 2 ເດືອນ ເຊິ່ງເປັນໄລຍະທີ່ໝາກເດືອຍແຕກແໜງ ແລະ ເຂົ້າທຳລາຍອີກຊ່ວງຫຼັງຈາກໝາກເດືອຍອາຍຸ 3-4 ເດືອນ ເຊິ່ງເປັນໄລຍະທີ່ເລີ່ມອອກດອກ ແລະ ຕິດເມັດ.

ການປ້ອງກັນກຳຈັດ:

· ສຳຫຼວດກຸ່ມໄຂ່ໜອນ ແລະ ຮູເຈາະທີ່ລຳຕົ້ນ ແລະ ກິ່ງແໜງຢ່າງສະໝ່ຳສະເໝີ.

· ຖ້າພົບການລະບາດຂອງໜອນເຈາະລຳຕົ້ນສາລີໃຫ້ສີດພົ່ນສານຂ້າແມງໄມ້ Deltamethrin ໃນອັດຕາ 10 ml/ນ້ຳ 20 ລີດ.

ໝາຍເຫດ: ເນື່ອງຈາກໃນປັດຈຸບັນບໍ່ມີການທົດລອງ ເພື່ອປ້ອງກັນກຳຈັດແມງໄມ້ສັດຕູຂອງໝາກເດືອຍ, ສານຂ້າແມງໄມ້ທີ່ແນະນຳໃຫ້ໃຊ້ຈຶ່ງເປັນສານຂ້າແມງໄມ້ທີ່ໃຊ້ໃນການປ້ອງກັນກຳຈັດແມງໄມ້ສັດຕູຂອງອ້ອຍ ແລະ ສາລີ ເຊິ່ງເປັນແມງໄມ້ຊະນິດດຽວກັນທີ່ພົບເຂົ້າທຳລາຍໝາກເດືອຍ.

1.1.3 ສັດຕູທີ່ສຳຄັນ

ກ. ໜູ

ລັກສະນະ ແລະ ການທຳລາຍ, ໜູເປັນສັດຕູພືດທີ່ສຳຄັນຊະນິດໜຶ່ງຂອງໝາກເດືອຍ, ທຳລາຍໃນຊ່ວງປູກໃໝ່ໆກ່ອນງອກ ແລະ ຊ່ວງໝາກເດືອຍຕິດເມັດ, ຊ່ວງເວລາໃນການລະບາດແມ່ນລະບາດຢ່າງຮຸນແຮງໃນຊ່ວງໝາກເດືອຍເລີ່ມຕິດເມັດ.

ການປ້ອງກັນກຳຈັດ:

· ກຳຈັດວັດສະພືດບໍລິເວນແປງປູກ ແລະ ພຶ້ນທີ່ໃກ້ຄຽງ ເພື່ອບໍ່ໃຫ້ເປັນທີ່ອາໄສຂອງໜູ.

· ໃຊ້ກົງດັກ ຫຼື ກັບດັກ.

· ເມື່ອສຳຫຼວດພົບຮ່ອງຮອຍຮູໜູ, ປະຊາກອນໜູ ແລະ ຄວາມເສຍຫາຍຢ່າງຮຸນແຮງຂອງໝາກເດືອຍ ໃຫ້ໃຊ້ວິທີປ້ອງກັນກຳຈັດແບບປະສົມປະສານຄືໃຊ້ກົງດັກ ຫຼື ກັບດັກຮ່ວມກັນກັບການໃຊ້ເຍື່ອພິດ.