ການປູກເຫັດເຟືອງ

 

 

ການປູກເຫັດເຟືອງ

ການປູເຫັດເຟືອງໃນໜານປູກສາມາດເຮັດໄດ້ຫຼາຍວິທີດັ່ງນີ້: ການປູກເຫັດເຟືອງແບບກອງສູງ, ການປູກເຫັດເຟືອງແບບກອງຕໍ່າ, ການປູກແບບອຸດສາຫະກໍາ ແລະ ການປູກ ໂດຍໃຊ້ເປືອກຖົ່ວຂຽວ ແຕ່ໃນນີ້ຈະເວົ້າເຖິງການປູກແບບກອງສູງ ແລະ ກອງຕໍ່າ ເຊິ່ງເປັນວິທີທີ່ເໝາະສົມປູກໃນປະເທດເຮົາ.

       9.1 ການປູກເຫັດເຟືອງແບບກອງສູງ

9.1.1. ວັດສະດຸອຸປະກອນທີ່ໃຊ້ປູກ

                         - ຕໍເຟືອງ: ຄວນມັດໃຫ້ດ້ານກົກ ແລະ ປາຍຢູ່ດ້ານດຽວກັນແລ້ວຕັດທາງປາຍໃຫ້ສະເໝີກັນແຕ່ລະຟ່ອນມີເສັ້ນຜ່າກາງ ປະມານ 20 cm.

                         - ສະຖານທີ່ປູກ: ຄວນໃກ້ກັບທົ່ງນາ ຫລື ໃນທົ່ງນາເລີຍຍິ່ງເປັນການດີເພື່ອສະດວກໃນການຂົນຍ້າຍມັດເຟືອງ ແລະ ເມື່ອສຳເລັດການປູກເຫັດເຟືອງແລ້ວເຟືອງກໍຈະຍ່ອຍສະລາຍຕົວເຊິ່ງເຮົາຈະໄຖກົບລົງໄປໃນດິນກໍຈະເປັນຝຸ່ນໄປເລີຍ.

                         - ຫົວເຊື້ອເຫັດເຟືອງ: ຄວນເປັນຫົວເຊື້ອທີ່ດີໃຫ້ຜົນຜະລິດສູງ, ເສັ້ນໄຍບໍ່ເປັນໝັນ ແລະ ເປັນຫົວເຊື້ອທີ່ບໍ່ອ່ອນ ຫລື ແກ່ເກີນໄປ.

                         - ວັດສະດຸທີ່ໃຊ້ປົກຄຸມໜານ: ນິຍົມໃຊ້ຜ້າຢາງເພື່ອຫງ່າຍຕໍ່ການສັງເກດເບິ່ງການຈະເລີນເຕີບໂຕຂອງເຫັດເຟືອງແຕ່ຜ້າຢາງໃສຈະມີຂໍ້ເສຍຄືເຫັດຈະໄດ້ຮັບແສງສະຫວ່າງຫຼາຍເກີນໄປ. ດັ່ງນັ້ນ ຄວນໃຊ້ຈ່າມຫຍ້າຄາ ຫລື  ເຟືອງແຫ້ງປົກຄຸມທັບຜ້າຢາງອີກເທື່ອໜຶ່ງ.

                         - ອາຫານເສີມ: ອາຫານເສີມສຳລັບເຫັດເຟືອງໄດ້ແກ່: ມູນສັດທີ່ສະລາຍຕົວດີແລ້ວ, ຜັກຕົບຊວາແຫ້ງ, ກາກຝ້າຍ, ໃຈງີ້ວ, ໃຈຝ້າຍເປັນຕົ້ນແຕ່ຄວນລະວັງພວກອາຫານເສີມເຫຼົ່ານີ້ຢ່າໃຫ້ມີເຊື້ອຣາປົນມານຳ.

                        - ໄມ້ຫຼັກສຳລັບປັກຫົວ ແລະ ທ້າຍໜານຈຳນວນ 4 ຫຼັກ, ໄມ້ແປ້ນໜາປະມານ 1.2 cm, ກວ້າງ 18 - 20 cm ແລະ ຍາວ ປະມານ 1 - 1.5 mຈຳນວນ 1 ແຜ່ນ ໄວ້ສຳລັບຕົບແຕ່ງ  ໜານໃຫ້ເປັນລະບຽບ.

                         - ບົວຫົດນໍ້າ

                         - ມີດ ແລະ ຈົກ

9.1.2. ວິທີການກຽມໜານກ່ອນປູກ

ໃນກໍລະນີທີ່ພື້ນທີ່ປູກເຄີຍປູກມາຫຼາຍຄັ້ງແລ້ວຄວນຂຸດດິນຕາກແດດ ຫລື ໂຮຍປູນຂາວເພື່ອຂ້າເຊື້ອ ຫຼັງຈາກນັ້ນຈຶ່ງປະຕິບັດຄື:

-    ກຳຈັດວັດຊະພືດໃນບໍລິເວນນັ້ນອອກໃຫ້ໝົດ

-    ໃຊ້ທາດເຄມີປະສົມນ້ຳຫົດໃຫ້ທົ່ວເພື່ອປ້ອງກັນມົດ ແລະ ແມງໄມ້.

-    ຍົກໜານໃຫ້ສູງຈາກພື້ນດິນປະມານ 18-20 cm ຄ້າຍຄືໜານປູກຜັກເພື່ອປ້ອງກັນບໍ່ໃຫ້ນ້ຳຖ້ວມ.

-    ພວນດິນໃນໜານໃຫ້ມຸ່ນເພື່ອໃຫ້ນ້ຳໄຫຼຊຶ່ມຜ່ານໄດ້ດີ ເພາະເຊື້ອເຫັດບາງສ່ວນຈະລົງໄປໃນດິນໄດ້ຮັບຄວາມຊຸ່ມໄດ້ດີ.

-    ໃນໄລຍະທີ່ກຽມໜານຄວນແຊ່ເຟືອງໄວ້ ໂດຍໃຊ້ເວລາປະມານ 2-4 h ເພື່ອໃຫ້ເຟືອງດູດນ້ຳໄດ້ດີຢ່າງເຕັມທີ່, ຖ້າເປັນເຟືອງໃໝ່ຄວນໃຊ້ເວລາແຊ່ດົນກວ່າເຟືອງເກົ່າ.

-    ປັກຫຼັກບໍລິເວນທ້າຍ ແລະ ຫົວຂອງໜານເພື່ອປ້ອງກັນບໍ່ໃຫ້ເຟືອງສະ ຫລື ເລື່ອນອອກຈາກນອກໜານ.

9.1.3  ຂັ້ນຕອນການປູກແບບກອງສູງ

ນຳເອົາມັດເຟືອງທີ່ແຊ່ນ້ຳແລ້ວນັ້ນມາວາງຮຽງກັນເທິງໜານ ໃຫ້ແຕ່ລະມັດຫ່າງກັນເລັກນ້ອຍ ໂດຍໃຫ້ດ້ານຕໍເຟືອງຢູ່ດ້ານດຽວກັນ ແລ້ວໃຊ້ໄມ້ແປ້ນທີ່ກຽມໄວ້ມາຕົບດ້ານຕໍເຟືອງໃຫ້ສະເໝີກັນທັງໜານ ຫຼັງຈາກນັ້ນ, ຈຶ່ງຕັດເຊືອກທີ່ມັດເຟືອງອອກຕໍເຟືອງທີ່ຈະຊະອອກຢ່າງສະໝ່ຳສະເໝີເຊິ່ງຈະໜາ ປະມານ  12-15 cm. ຈາກນັ້ນກໍຂຶ້ນຢຽບໃຫ້ແໜ້ນພ້ອມທັງຫົດນ້ຳດ້ວຍບົວໃຫ້ຊຸ່ມ.

- ໂຮຍອາຫານເສີມໃຫ້ຫ່າງອອກຈາກຂອບໜານປະມານ 1 ຝາມື

- ໂຮຍຫົວເຊື້ອໃສ່ເທິງອາຫານເສີມ

- ເມື່ອເຮັດຊັ້ນທີ 1 ສຳເລັດແລ້ວກໍເຮັດຊັ້ນທີ 2 ຕໍ່ແຕ່ຄວນນຳເອົາເຟືອງວາງສະຫຼັບດ້ານຕໍເຟືອງກັບດ້ານທີ 1 ແລ້ວຕັດ ຫລື ຮຳສ່ວນປາຍທີ່ເລື່ອນອອກມາໃຫ້ສະເໝີກັນ ຫຼັງຈາກນັ້ນກໍຕັດເຊືອກທີ່ມັດຕໍເຟືອງອອກເຂ່ຍໃຫ້ສະໝ່ຳສະເໝີຂຶ້ນຢຽບໃຫ້ແໜ້ນພ້ອມທັງຫົດນ້ຳໃຫ້ຊຸ່ມ. ຈາກນັ້ນຈຶ່ງໂຮຍອາຫານເສີມ ແລະ ໂຮຍຫົວເຊື້ອເທິງອາຫານເສີມຄ້າຍກັບຊັ້ນທີ 1 ແລະ 2 ໂດຍໃຫ້ແຕ່ລະຊັ້ນໃຫ້ສະຫຼັບທາງດ້ານຕໍເຟືອງສະເໝີ.

        - ສ່ວນຊັ້ນສຸດທ້າຍ ຄວນໂຮຍອາຫານເສີມ ແລະ ຫົວເຊື້ອ ໃຫ້ທົ່ວເລີຍກໍໄດ້ແລ້ວໃຊ້ເຟືອງປົກຄຸມໃຫ້ໜາພໍປະມານພ້ອມທັງຫົດນ້ຳໃຫ້ຊຸ່ມ. ເມື່ອຮອດຊັ້ນສຸດທ້າຍເຮົາກໍຈະໄດ້ໜານເຫັດສູງປະມານ 50 - 60 cm.

                             - ໃຊ້ຜ້າຢາງປົກຄຸມໜານເພື່ອຮັກສາຄວາມຊຸ່ມ ແລະ ບໍ່ໃຫ້ໄດ້ຮັບແສງສະຫວ່າງເກີນໄປ.

9.1.4 ການບົວລະບັດຮັກສາໜານເຫັດແບບກອງສູງ

                          ຫຼັງປູກໄດ້ 3 - 4 ມື້ຄວນກວດເບິ່ງ ສະພາບຄວາມຊຸ່ມ ແລະ ອຸນຫະພູມໃນ ໜານວ່າເໝາະສົມຕໍ່ການຈະເລີນເຕີບໂຕ ຫລື ບໍ່ ໂດຍໃຊ້ຫຼັງມືແປະເບິ່ງທີ່ໜານເຫັດເຟືອງດ້ານໃນເຊິ່ງ   ໜານເຫັດຈະຕ້ອງມີອຸນຫະພູມສູງກວ່າຂ້າງນອກແຕ່ຖ້າສູງເກີນໄປໃຫ້ເປີດຜ້າຢາງອອກປະມານ 1 - 2 h ເພື່ອໃຫ້ອາກາດຖ່າຍເທອອກ. ຈາກນັ້ນຈຶ່ງປົກຜ້າຢາງຄືນ.

-  ໃນໄລຍະ 3 - 4 ມື້ນີ້ອາດຈະໃຊ້ວິທີການ, ໜານເຫັດເຟືອງ ໂດຍໃຊ້ເຟືອງໂຮຍອ້ອມໜານດ້ານຂ້າງ ແລະ ເທິງແລ້ວຈູດໄຟຂຶ້ນໄຟກໍຈະໄໝ້ເສດເຟືອງທີ່ເລື່ອນອອກມາຂ້າງໜານເຊິ່ງເສດເຟືອງທີ່ຖືກເຜົາກໍຈະກາຍເປັນຂີ້ເຖົ່າ ແລະ ມີລິດເປັນດ່າງເລັກນ້ອຍ ເຊິ່ງມີຜົນຕໍ່ການຈະເລີນເຕີບໂຕ ຂອງເຫັດເຟືອງເຮັດໃຫ້ດອກໃຫຍ່ ແລະ ຜົນຜະລິດສູງຂຶ້ນ ວິທີນີ້ຈະບໍ່ປະຕິບັດກໍໄດ້ແຕ່ຊ່ວງຍາມໜາວອຸນຫະພູມໃນໜານອາດຕ່ຳການເຜົາໜານເຫັດອາດຈະຊ່ວຍເຮັດໃຫ້ອຸນຫະພູມໃນໜານສູງຂຶ້ນໄດ້.

-  ຫຼັງປູກໄດ້ 7 ມື້ໃຫ້ເປີດຜ້າຢາງດ້ານຂ້າງ ແລະ ໃຊ້ມືຮື້ຊັ້ນ ຂອງເຟືອງເບິ່ງ

ກໍຈະເຫັນມີເສັ້ນໄຍ ຂອງເຫັດເຟືອງເປັນສີຂາວຈະເລີນອອກມາໃຫ້ເຫັນຢ່າງຊັດເຈນເສັ້ນໄຍເຫຼົ່ານີ້ຈະກາຍເປັນດອກເຫັດຕໍ່ໄປ. ໃນໄລຍະນີ້ຖ້າເຫັນວ່າໜານເຫັດແຫ້ງເກີນໄປກໍໃຫ້ຫົດນ້ຳດ້ວຍບົວເລັກນ້ອຍ ຫລື ອາດຈະຫົດບໍລິເວນອ້ອມໜານໃຫ້ປຽກ ແລະ ປົກຜ້າຢາງຄືນຖ້າປູກໃນລະດູໜາວເສັ້ນໄຍຈະເຕີບໂຕຊ້າກວ່າລະດູຮ້ອນ ໂດຍໃຊ້ເວລາປະມານ 12 - 15 ມື້, ສ່ວນການຈະເລີນເຕີບໂຕ ຂອງເສັ້ນໄຍຈະພົບເຫັນຫຼັງຈາກປູກໄດ້ 7 - 9 ມື້, ຫຼັງປູກໄດ້ 12 - 15 ມື້ ຈະພົບເຫັນດອກເຫັດເລີ່ມງອກອອກມາທາງດ້ານຂ້າງ ແລະ ດ້ານເທິງຂອງໜານ ແລະ ບາງເທື່ອກໍຈະງອກອອກມາຕາມໜ້າດິນດ້ານຂ້າງ ຂອງໜານອີກດ້ວຍ. ໄລຍະນີ້ຄວນລະວັງຢ່າໃຫ້ນ້ຳແກ່ໜານເຫັດ ຄວນລະວັງບໍ່ໃຫ້ຝົນຕົກລົງຖືກໜານເຫັດເພາະດອກເຫັດຈະເໜົ່າແຕ່ຖ້າໜານເຫັດແຫ້ງເກີນໄປກໍແກ້ໄຂ ໂດຍການຫົດນ້ຳອ້ອມຮອບໜານເຫັດແລ້ວໃຊ້ຜ້າຢາງປົກຄຸມຄືນ.

-  ການເກັບຜົນຜະລິດ: ຄວນເລືອກເກັບເອົາແຕ່ດອກທີ່ຢູ່ໃນໄລຍະຈູມຢູ່ ຫລື ໄລຍະຮູບໄຂ່ ເຊິ່ງຖືວ່າເປັນໄລຍະທີ່ໃຫ້ນ້ຳໜັກດີ ແລະ ມີຄຸນຄ່າທາງອາຫານສູງການເກັບດອກເຫັດຄວນລະມັດລະວັງບໍ່ໃຫ້ດອກທີ່ຢູ່ໃກ້ກະທົບກະເທືອນ ເພາະຖ້າເສັ້ນໄຍຂາດກໍຈະເຮັດໃຫ້ດອກທີ່ເຫລືອໃນໜານຊະງັກການຈະເລີນເຕີບໂຕ ແລະ ຖ້າເປັນດອກທີ່ຍັງນ້ອຍຈະເຮັດໃຫ້ດອກເຫັດຟໍການເກັບດອກຄວນເກັບໃນເວລາເຊົ້າ (ອາຈານບຸນສົ່ງ ວົງກຽງໄກ, 2000).

9.2. ການປູກເຫັດເຟືອງແບບກອງຕ່ຳ

  - ເປັນວິທີທີ່ນິຍົມກັນຫຼາຍເພາະເປັນວິທີທີ່ປະຢັດເຟືອງ ແລະ ບໍ່ຈໍາເປັນຕ້ອງໃຊ້ເພື່ອປູກແຕ່ຢ່າງດຽວຈຶ່ງສາມາດປູກໄດ້ທຸກລະດູການ.ວັດສະດຸທີ່ໃຊ້ປູກເຊັ່ນ: ເຟືອງແຫ້ງ, ກ້ານກ້ວຍ, ຕົ້ນກ້ວຍ ຫລື ຈະໃຊ້ຫຼາຍຢ່າງປະສົມກັນກໍໄດ້.

- ອາຫານເສີມ : ນັບວ່າມີຄວາມສຳຄັນຕໍ່ກັບການປູກເຫັດເຟືອງແບບກອງຕໍ່າຫຼາຍເພາະວັດສະດຸທີ່ໃຊ້ປູກມີທາດອາຫານໜ້ອຍກວ່າຕໍເຟືອງ ຈຶ່ງຈຳເປັນຕ້ອງເພີ່ມອາຫານເສີມໃຫ້ເຫັດອາຫານເສີມ ດັ່ງກ່າວປະກອບມີ: ກາກຝ້າຍ, ໃຈງິ້ວ ແລະ ຜັກຕົບຊວາແຫ້ງ ຖ້າຕ້ອງການເພີ່ມປະລິມານທາດອາຫານໃຫ້ສູງຫຼາຍຂຶ້ນເຮົາຄວນນຳເອົາອາຫານເສີມມາຄົນກັບຮຳອ່ອນໆ ໂດຍໃຊ້ອາຫານເສີມ 10 kg/ຮຳ 1-2 kg.

-  ຮາງສຳລັບປູກ: ນັບວ່າມີຄວາມສຳຄັນໃນການປູກເຫັດເຟືອງແບບກອງຕ່ຳ, ຮາງໄມ້ທີ່ນິຍົມແມ່ນເປັນຮູບ 4 ລຽມຄາງໜູ, ສູງປະມານ 30 cm ຍາວປະມານ 1.5 m ຄວາມກວ້າງດ້ານເທິງ ປະມານ 30 cm ສ່ວນຄວາມກວ້າງດ້ານລຸ່ມປະມານ 40 cm.

- ຫົວເຊື້ອເຫັດເຟືອງ: ຄວນເປັນຫົວເຊື້ອທີ່ດີ, ໃຫ້ຜົນຜະລິດສູງ, ບໍ່ແກ່ ຫລື ອ່ອນເກີນໄປ ແລະ ບໍ່ເປັນໝັນ.

- ບົວຫົດນໍ້າ

- ຜ້າຢາງສຳລັບປົກຄຸມໜານ

- ວັດສະດຸຄຸມໜານ: ອາດໃຊ້ຈ່າມຫຍ້າຄາ ຫລື ເຟືອງ (ອະພິຊາດ ແລະ ພິ້ມ, 2012).

9.2.1 ການບົວລະບັດຮັກສາໜານເຫັດເຟືອງ

            ການປູກເຫັດເຟືອງແບບກອງຕ່ຳ ມັກຈະພົບອຸນຫະພູມໃນໜານຂ້ອນຂ້າງຕ່ຳກວ່າແບບກອງສູງ ໂດຍສະເພາະໃນຊ່ວງລະດູໜາວແຕ່ຄວນແກ້ໄຂ ໂດຍການເຮັດໃຫ້ຫຼາຍຊັ້ນຂຶ້ນສ່ວນການບົວລະບັດຮັກສາແມ່ນປະຕິບັດດັ່ງນີ້:

9.2.2 ການບົວລະບັດໜານເຫັດແບບກອງຕ່ຳໃນລະດູຮ້ອນ

ໃນລະດູຮ້ອນນີ້ຈະເຫັນວ່າມີອຸນຫະພູມສູງເກີນໄປ ດັ່ງນັ້ນ ຜູ້ປູກຄວນປະຕິບັດດັ່ງນີ້:

- ໃນຊ່ວງມື້ທີ 1 - 3 ໃຫ້ຄຸມຜ້າຢາງໃຫ້ແຈບດີເພື່ອຮັກສາຄວາມຊຸ່ມ ແລະ ອຸນຫະພູມໃນໜານໃຫ້ເໝາະສົມ ແຕ່ຖ້າເຫັນວ່າອຸນຫະພູມສູງເກີນໄປໃຫ້ເປີດຜ້າຢາງອອກເພື່ອຖ່າຍເທອາກາດ ແລະ ຊ່ວຍຫຼຸດຜ່ອນອຸນຫະພູມໃນໜານລົງ ນອກນີ້ຍັງຕ້ອງໃຊ້ວັດສະດຸທີ່ປົກຄຸມໜານເປັນຕົ້ນແມ່ນຈ່າມຫຍ້າຄາ ຫລື ເສດເຟືອງອື່ນໆ.

- ຫຼັງຈາກປູກໄດ້  3 ມື້ ໃຫ້ຕັດແຕ່ງເສດເຟືອງ ຫລື ເຜົາຂອບໜານເພື່ອໃຫ້ເປັນລະບຽບສະດວກໃນການເກັບດອກໃນໄລຍະນີ້ ຖ້າໜານເຫັດແຫ້ງເກີນໄປຄວນໃຊ້ໄມ້ໃຜ່ສານເປັນແຕະໂດຍໃຫ້ຂະໜາດຂອງຕາ ປະມານ 8 - 10 cm ທັບໜານເຫັດໄວ້ແລ້ວໃຊ້ເຟືອງຈຸບນ້ຳໃຫ້ຊຸ່ມຄຸມທັບລົງໄປແລ້ວ ຈຶ່ງປົກຄຸມໜານໄວ້ຄືເກົ່າ.

- ຫຼັງປູກໄດ້ 7 - 6 ມື້ ເສັ້ນໄຍຂອງເຫັດເຟືອງຈະລວມຕົວກັນເປັນຕຸ່ມນ້ອຍໆໃນໄລຍະນີ້ຫ້າມຫົດນ້ຳເດັດຂາດເພາະຈະເຮັດໃຫ້ດອກເຫັດຝໍໄດ້ ຖ້າເປັນຊ່ວງລະດູຝົນຕ້ອງລະວັງບໍ່ໃຫ້ຝົນຖືກໜານເຫັດ.

9.3 ການບົວລະບັດຮັກສາໜານເຫັດໃນລະດູໜາວ

ການປູກເຫັດໃນລະດູນີ້ ມັກມີບັນຫາເລື່ອງອຸນຫະພູມໃນໜານຕ່ຳເກີນໄປ ເຮັດໃຫ້ການຈະເລີນເຕີບໂຕຂອງເສັ້ນໄຍບໍ່ດີເທົ່າທີ່ຄວນຈະຕ້ອງເຮັດໃຫ້ອຸນຫະພູມສູງຂຶ້ນ ຄວນປະຕິບັດດັ່ງນີ້:

- ຫຼັງປູກຮຽບຮ້ອຍແລ້ວຄວນຫົດນ້ຳໃຫ້ຊຸ່ມດີ ພ້ອມທັງໃຊ້ຜ້າຢາງປົກຄຸມໃຫ້ແຈບດີທັງດ້ານເທິງ ແລະ ຂ້າງເພື່ອຊ່ວຍໃຫ້ອາກາດທາງໃນໜານເຫັດໃຫ້ສູງຂຶ້ນ.

- ຫຼັງປູກໄດ້ 3 ມື້ ຄວນກວດເບິ່ງສະພາບຄວາມຊຸ່ມ ແລະ ອຸນຫະພູມໃນໜານເຫັດວ່າເໝາະສົມແລ້ວ ຫລື ບໍ່ ຖ້າອຸນຫະພູມຕ່ຳເກີນໄປກໍໃຫ້ເພີ່ມອຸນຫະພູມ ໂດຍການນຳເອົາເສດເຟືອງມາໂຮຍອ້ອມຮອບໜານເຫັດບາງໆ ແລ້ວຈູດຈະເຮັດໃຫ້ອຸນຫະພູມສູງຂຶ້ນ ແລ້ວຈຶ່ງປົກຄຸມຜ້າຢາງໄວ້ຄືເກົ່າ.

- ຫຼັງປູກໄດ້ 4 - 5 ມື້ ຄວນເປີດຜ້າຢາງອອກເພື່ອໃຫ້ອາກາດພາຍໃນໜານປູກຖ່າຍເທດີຂຶ້ນ ຖ້າເປັນໄປໄດ້ຄວນລະວັງບໍ່ໃຫ້ຜ້າຢາງທີ່ປົກຄຸມເຫັດ ສຳພັດກັບໜານທາງດ້ານເທິງ ແລະ ດ້ານຂ້າງເພາະຈະເຮັດໃຫ້ດອກເຫັດທີ່ເກີດຂຶ້ນສຳພັດກັບຜ້າຢາງອາດເຮັດໃຫ້ດອກເຫັດຝໍໄດ້.

- ຫຼັງປູກໄດ້ 10 - 12 ມື້ເສັ້ນໄຍເຫັດຈະເລີ່ມລວມຕົວກັນ ແລະ ຈະເລີນເປັນຕຸ່ມດອກເຫັດນ້ອຍໆຈາກນັ້ນຈຶ່ງຄ່ອຍຈະເລີນເຕີບໂຕເປັນດອກເຫັດຕໍ່ໄປ (ອະພິຊາດ ແລະ ພິ້ມ, 2012).

Share: